#حوارات_سينمائية / المنتج والمخرج محمد أمخاو صاحب شركة إنتاج ماسيليا Massilia Production
اعداد جمال الحور
يسرني أنه يكون أول ضيف في برنامج #حوارات_سينمائية المنتج والمخرج " محمد أمخاو " صاحب شركة إنتاج ماسيليا Massilia Production مخرج السلسلة الرمضانية " اييه وايني أوهو " إافة إلى عدة أعمال فنية وبرامج حوارية.
لنتعرف عن محمد أمخاو وعن أعماله أكثر في هذا الحوار.
1 - ازول أولا ماكرهناش شي نبدة صغيرة عن محمد أمخاو ؟؟
2- بداية المسيرة الفنية ديالك كانت على ما أظن تسجيل أغاني صوتية من بعد تحولت من السمعي إلى السمعي البصري أي كيفاش جات الفكرة ؟؟
صحيح بعدما اكتشفت صوت الفنانة نوميديا .. درنا واحد استوديا بسيط فالمنزل .. من بعد جاتني فكرة علاش مانديرش استوديو كامل مجهز ونفتحو فباب الفنانين لي بغى يسجل خصوصاً أن صهري رشيد حتى هو تقني الصوت .. بدينا باستوديو ديال التسجيل وفتح لينا باب الإحتكاك والتعرف عن قرب عن الميدان الفني تقنيين وفنانين ومخرجين .. قلت علاش مانديروش إنتاج سمعي بصري .. بدينا بأول فيلم صورناه حنا طقم شركة ماسيليا فقط .. من بعد جاو أعمال أخرى مثل فيلم " تامونت إيدرن " لي كاتدور القصة ديالو حول التعايش بين المغاربة المسلمين واليهود والمسيح في الماضي من إخراج عبد العزيز اوالسايح لي رحب بالفكرة منذ البداية ..وكذلك فيلم " تامديازت " من كتابة رشيد أسلال ودرت ليه أنا نيت الإخراج وبعده فيلم أخر للكاتب لحسن سرحان ... وكل هذه الأفلام تم العرض ديالها فمهرجانات سينمائية وحصلات على جوائز ولقات استحسان الجمهور ولكن لحد الآن لم يتم عرضها في أي منصة لكن برمجنا عرض " تامديازت " في قناة ماسيليا فالأخير ديال رمضان ...
3 - شهدنا لك أعمال برامج حوارية بداية ببرنامج أسلال شو ثم نيشان ن أوسماود هل لك أن تحدثنا عن هذ التجربة ؟؟
فكرة برنامج أسلال شو كما سبق وقلت ليك أن من بعد استوديو للتسجيل مفتوح فباب الفنانين عطاني فرصة التقرب منهم .. جات فكرة ديال ديال برنامج " أسلال شو " لي كان الهدف منو التعرف عن قرب للموسيقيين خصوصاً ضابطي الإقاع أو "إضرابن " لي مكايعرفش عليهم الجمهور بزاااف .. ومن الأمور لي استغربت ليها أنه كاينين مغنيين وجهنا ليهم دعوة ورفضوها حيث مكايقدروش إغنيو مباشر كايعتمدو على المؤثرات الصوتية .. وكان الهدف من البرنامج هو هذا التمييز بين مغني الحقيقي والمزيف... أما بخصوص " "نيشان ن أوسماود "كنت كانشوف برامج حوارية كاينة قبل منو ولكن كانكتشف شي أمور أو كانعرف معلومات عن الفنانين ما كنتش كانعرفها عليهم من قبل .. هنا طرحت سؤال علاش بحال هاذ الأمور مكايقولوهاش فالبرامج الأخرى ؟؟ هنا قلت علاش مايكونش عندنا برنامج أكثر جرأة شوية .. وختاريت هذ الإسم الذي يبدو ساخر شيئاً ما وكايخلي الفنان أنه يقول غادي لبرنامج تافه امكن او ساخر ممكن يلقى فيه راحتو ويعبر كيما بغى .. ولكن وسط السخرية كايكون المعقول.
4 . واش كايكون شي إعداد مسبق أو تحضير بينك وبين الضيف أي الإتفاق على الأسئلة على سبيل المثال ؟؟
لا أبدا كانمشي كاندير واحد بحث على الضيف وقبل الدخول للپلاطو كانجلسو فالكواليس كانهضر معه ..الأسئلة ديالي كانجيبها انطلاقا من البحث وهد الجلسة اي مكايكونش حتى شي إتفاق.
5-كاين لي كايقول بلي برنامج نيشان ن أوسماود كايزيد إخلق صراعات وسط الفن الأمازيغي؟
بل بالعكس مكانظنش حنا كانوفرو واحد الفضاء للفنان للتعبير عن رأيه .. ويعرف الجمهور الرأي ديالو فجميع الأمور .. لكن هذا لا يعني اننا نقول ان رأيه صحيح .. وليس كل ما قيل في البرنامج فهو صحيح او يتبناه البرنامج .. أنا كانطرح سؤال كايجاوب الضيف وكايتحمل مسؤولية كلامه وأنا كانخلي حرية التعبير في إطار إحترام الآخرين ودون شخصنة النقاش .. وضطرينا نحييدو بزاااف ديال الحوارات كايتكلم فيها الضيف عن الأشخاص بدل العمل الفني.. وبعد الصدى لي عطاه الموسم الأول للبرنامج فكرنا لتصوير الموسم التاني في پلاطو جديد وديكور وأفكار أخرى جديدة.
5- أهنئك أولا على النجاح لي حققاتو السلسلة الكوميدية " أيييه وايني أوهو " هل تستطيع أن تحدثنا عن هذا العمل على سبيل المثال مدة التصوير ؟؟ الصعوبات والإكراهات لي لقيتو ؟؟ سر النجاح ديالها في نظرك بصفتك مخرج لها ؟
سلسلة " أيييه وايني أوهو " كانت عندي فكرة ديالها .. ولكن مكانتش عارف شكون لي يقدر يكتبها كسيناريو كيما كانشوفها أنا .. أي الشخص لي اشاركني نفس الرؤية وبحكم أنني كانتبع جميع الأعمال الأمازيغية ديال الشركات المنتجة لخرى .. شفت أن عبد الرحيم أشهبون هو الشخص لي اقدر إبداع فهذ النوع من السلسلات.. اقترحت عليه الفكرة ورحب بها .. وبدا الكتابة وكان كايشارك معايا كل حلقة إلى كملات فالكتابة وكاناقشوها مزال وكانعطيه الملاحظات ديالي .. هذ العملية سهلات علينا بزاااف فوقت التصوير اي كانوصلو الپلاطو وحنا مفاهمين .. المدة ديال التصوير تقريباً أقل من شهر وللآسف لم يسعفنا الحظ أننا نقدرو نصورو تلاثين حلقة قبل حلول رمضان واكتفينا ب 22 حلقة فقط حيث كل حلقة كانعطيوها وقتها الكافي على المستوى التقني والفني .. قلنا إذا كنا غانصورو تمانيات حلقات لي بقاو بسرعة وغانديرو خدمة ضرب ودوز كما يقال من الأحسن نكتافيو ب 22 حلقة .. أما بخصوص نجاح السلسلة ساهموا تما بزااف ديال العوامل أولها الكتابة لي هي العمود الفقري ديال نجاح أي عمل .. عاد ظروف أو بيئة الإشتغال ديال الطقم التقني والفني .. أي كلشي خدام مرتاح وكل واحد بالتخصص ديالو .. وكل واحد كيحتارم لاتاش ديالو.. بمعنى الممثل مهمته أنه يدخل لپلاطو يمثل فقط .. لدرجة أن أبطال السلسلة اول مرة جاو وحنا كانستاعدو للتصوير تصدمو من عدد التقنيين لي فالعمل وهادشي راجع لأنهم كايخدمو مع شركات أخرى منهم ممثلين منهم تقنيين منهم ديكور .. انا كانشوف أن ظروف العمل كاتلعب دور كبير فالنجاح ديالو.
6 -علاش مكانشوفوش أعمال ماسيليا للإنتاج فالإعلام العمومي واش سبق لشركة ماسيليا للإنتاج دفعات أعمال للقنوات الوطنية؟؟
لا لا بالعكس كاينة أعمال ديال ماسيليا دازت فقناة تمازيغت مثل سلسلة " أورجو " وفيلم " تامديازت " وسلسلة " تيقبورين " ولي كاتدوز فهاذ رمضان نيت.
واش سبق لشركة ماسيليا استفدت من الدعم العمومي أي في طلبات العروض كاتحطو المشاريع ديالكم ؟؟
صحيح كانحطو مشاريع لطلبات العروض ولكن ماعمرنا استفذنا من الدعم العمومي .. وحتى هذ العام دفعنا ولكن مكاين والو .. اتذكر واحد العام حطيت سيناريو وترفض .. ملي مشيت ندير استفسار عن سبب الرفض قالوا ليا أنه ماوصلش للجنة لسبب أنه تنقصه وثيقة إدارية.. ولكن لم أتلقى أي اتصال حول هذ الوثيقة .. عكس ما هو معمول به فقطاعات أخرة مثل طلب دعم وزارة الثقافة كايبقاو معك على اتصال حتى يستوفي ملفك جميع الشروط .. أما بخصوص الأعمال الأخرى لي دكرت ليك دازت فالقناة الأمازيغية هي إهداء من إنتاج خاص لشركة ماسيليا .. ودوك الأعمال تصورو بالمعايير المعتمدة عليه فالتلفازة .. حقيقة أتمنى أن نحظى بإنتاج أعمال بشراكة مع القناة التامنة حيث عندي الثقة الكاملة أننا غانعطيو أكثر.
7- إذا كنت تتفق معي فهذ الأواخر كاين تراجع كبير على مستوى الجودة فالأعمال السوسية مقارنة بفترة كاسيط Vidéo وVCd شنو سبب هذ التراجع فين كاتشوف نتا كاين عندنا نقص شنو سبب في رأيك ؟؟
صحيح اتفق معاك لكن هدشي وليد اليوم .. أظن أنه حتى الحقبة ديال VCd ساهمت في ما وصلنا إليه اليوم .. حيث كانوا أعمال حتى فداك الوقت أعمال ترسخ كوميديا تاباقشيشت وخلات لينا جمهور باغي داك النوع من الأعمال وكاين تراجع حتى على مستوى الكتابة على سبيل المثال إلى رجعنا لفيلم " تايري إسيويدن " الفيلم فيه حبكة كتابية مذهلة باش غاتفهم الفيلم خاصك تفرج فيه جوج وتلاثة د المرات عاد باش تفهمو وكذلك "تامغارت ن وورغ " و " توف تانيرت " انا كانشوف أن حتى كتاب السيناريو اتجهو نحو الكتابة لي بغى الجمهور .. وكذلك المنتجين ليس من الصعب أنك تحاول تدير شي حاجة فالمستوى ولكن غاتكون مغامرة وغاتاكل فيها العصى وغاتلقى إنتقادات كبيرة .. اليوم حنا بين خيار يا تدير داكشي لي باغي الجمهور ولو لم تتفق معه يا إما تغامر وتدير شي حاجة انت مقتنع بها وغاتغامر وتاكل العصى ولكن ممكن الأجيال القادمة تعرف بقيمتها وتعجبها ..
ما رأيك في مسلسل" إليس ن ووشان " كاتفرج فيه بعد ؟؟
أكيد متبعو حلقة بحلقة بحكم أنني مهتم بالشأن الفني وعندي تشويق وبغيت نفك رموز القصة ونعرف نهايتها .. لهذا مانقدرش نعطيك رأيي الشخصي فيه حاليا على المستوى التقني والفني لكن النقاش الدائر حالياً حوله أنا كانشوفو نقاش صحي..
الكلمة الأخيرة سي محمد للجمهور والناس العاملين بالقطاع الفني ؟؟
كانقول شكراً للجمهور حيث رغم كل شيء كايتفرج كايشوف وخير دليل هاذ النقاش لي كاين .. فقط أنصح الأباء باش ولادهم إشجعوهوم على مشاهدة الأعمال الأمازيغية .. حيث كانشوف غا فالقناة ديالنا ماسيليا نسبة المشاهدة ديال الأطفال والمراهقين ضئيلة جداً وهذا مؤشر خطير حيث خاصنا نربيو الأجيال القادمة على حب كل ما يتعلق بالهوية ديالهم .. وكذلك أنصح الجمهور الأمازيغي على الإنفتاح على سينما الشعوب الأخرى باش تكون عندو نظرة فنية .. حيث الحل في نهاية المطاف كايبقى عندو إذا بغى أعمال جيدة وفالمستوى راه غاتكون إذا قبل بهدشي لي كاين حاليا راه هو لي غايبقى..
ليست هناك تعليقات:
إرسال تعليق